والد الشهيد البطل محمد جمال سليم لـ"الزمان المصرى ": أقول لكل الثوار اثبتوا..وأوعوا تنسوا حق اللي مات ..وتضيعوا ثورتكم ودم أخواتكم

مر عامين على استشهاد البطل محمد جمال سليم فى أعقاب ثورة 25 يناير، رحل بجسده وظلت روحه ترفرف على الثائرين ، رحل وترك لنا حقه ، ورثنا التركة منه ،ولكننا حتى الآن لم نأخذ حقه ولا حق أقرانه ،فقاتليهم خلف القضبان يهنئون وبرأوا من تهمة قتل خيرة شباب مصر .
"الزمان المصرى" تحاورت مع والد الشهيد:-
الزمان المصرى : محمد عبد الغني

رأيك فى الحكم القضائي لمبارك ونجليه وحبيب العادلي و6 من مساعديه؟

**ده سيناريو من أول الثورة يسعي القائمون علي الحكم من رجال مبارك والفلول والمجلس العسكري والقضاء علي تطبيقه ..أوعي يتخيلوا أن حق الشهيد هيضيع ..أنت يا احمد يا رفعت لما عندك قضية غير مكتملة اشتغلت فيها ليه..بتقول إن القضية60الف ورقة مفيش ورقة تدين المجرمين..أنت ليه أصريت علي انك تمسك القضية ولا هما هددوك بالأراضي اللي عندك.
ما هو تعليقك علي تصريحات المستشار الزند؟
**القاضي بيعرض منظر في محاكمة مبارك واحتجاج المحامين علي الحكم..أنت متفرجتش علي قتل ولادنا من يوم جمعة الغضب والسيناريو اللي حصل..نجيب العربية الدبلوماسية اللي دهست الثوار..الثوار اللي ماتوا قدام مديريات الأمن والأقسام ) ،ومستحيل دم شهيد من ولادنا هيروح الأرض..أوعوا يفتكروا إننا هنسيب حق ولادنا..يوم ما هيحصل ضرب نار..ضد الضباط اللي قتلوا ولادنا..هنضرب اللواءات مش الصغيريين..
((ياجماعة الثورة قامت مش راجعة تاني ..لو علي جثة آخر مصري..دم ولادنا مش هيضيع..اللي ضرب ابني مش أحسن من ابني..هما عارفين مين القتلة..الشهداء ماتوا علشان مصر ..واللي أصيب و راحت عنيه راحت.. علشان مصر.

ماهي توقعك للحكم النهائي لقتلة الثوار بالمنصورة يوم14 مايو؟

**احنا عارفين انهم هيطلعوا براءة..استكمال للمسرحية اللي بينفذها المجلس العسكري والداخلية..احنا رايحين المحاكمة وعارفين انهم هيطلعوا براءة ..هما فاكريين دم ولادنا راح..مستحيل..هنقتص من اكبر رأس فالبلد..1500شهيد مش هيروح

ما شعورك اليوم بعد مرورعامين علي ذكري استشهاد خالد سعيد ولم يات حقه؟

**انا شايله صورة خالد سعيد..ومحمد جمال سليم وكل الشهداء .بقول لخالد سعيد..أنت كنت المصباح اللي أضاء مصر وأشعل الثورة..احنا بنواسي ام الشهيد خالد سعيد..ونقولها حقه وحق أخواته مش هيضيع..وأقول زي ماقالت ام خالد سعيد(ان ده كان امتحان سقطنا في اول تيرم ..التيرم التاني هنجيب امتياز)

ما هى الرسالة التى توجهها للمجلس العسكري؟
**يا رجاله الجيش ياحماة الوطن..أتمني تكون روح الشهداء باقة ورد تعلق في صدر كل واحد فيكم ..متضيعوش حق اللي مات..عيب عليكم عيب إن الجيش هو اللي يدوس علي دم ولاده ..انتم حرام عليكم الدم المصري..احنا كنا نتمي ليكم خروج مشرف لو كنتم رجعتم حق اللي مات.

ما رأيك في الفترة الانتقالية تحت حكم المجلس العسكري؟ هل رجعوا دم محمد سليم وحق كل الشهداء؟
قيادات المجلس العسكري ساهموا في هدر الدم المصري .أتمني أن يقدم كل من قتل الثوار من الداخلية أو الحربية إلي المحاكمة العادلة ..لان ولا البلد هترحمكم ولا التاريخ هيرحمكم ..ارجعوا وخدوا العبرة من فرعون الأمة(مبارك)

أنا بقول للمجلس العسكري أنت حكمت علي كل قاتل أخد براءة بالإعدام لأننا مش هنسيب اللي قتل ابننا.
احنا بنطالب بالاتي:
1-بمحاكم ثورية لقتلة الشهداء.
2- بطالب بالقصاص العادل لدماء الشهداء.

رسالتك للثوار؟
**أقول لكل الثوار اثبتوا..وأوعوا تنسوا حق اللي مات ..وتضيعوا ثورتكم ودم أخواتكم.

إحنا هنستمر في النزول نطالب بحق الشهداء ..بنطالب بعزة مصر..لازم مصر تتطهر من الفساد
**ملحوظة : هذا الحوار تم إجراؤه منذ فترة